6 أشياء يعتقد الرجال أن المرأة تعشقهم

تعالوا بقى نعرف إيه الحاجات اللى الرجالة فاكرين إنها بتجنن الستات .

من كتر ما المرأة بتشتكى فى الحقيقة وفى الأفلام من إن الراجل رامى عليها شغل البيت كله ، فالرجالة إفتكروا إن مساعدتها فى الأعمال المنزلية سيجلب عليها السعادة والحب ، ولكن الموضوع مش سهل كده ، صحيح المرأة عايزة إللى يساعدها في البيت ولكن الراجل أحيانا بيقوم بالدور ده بشكل خاطئ و يدخل نفسه فى حاجات ميفهمهاش و يبوظ الدنيا بفكاكته ونصاحته ويقلب البيت على بعضه .

الصراحة والشفافية

و طبعآ الصراحة مطلوبة ، ولكن كتير من الرجالة فاكرين إن الصراحة تساوى البجاحة ، يعنى لو مراته سألته " هل ملكة جمال العالم أجمل منى ؟ " تلاقيه قالها " طبعآ أحلى منك .. دى ملكة جمال العالم كله " وهنا بقى سلملى على الصراحة ، وإبقى قابلنى لو الشفافية نفعتك .

الإصرار على دفع الحساب

مش هنقول هنا إن المرأة مش دايمآ عايزة الراجل اللي يدفع الحساب ، ولكن فى بعض الأوقات و خصوصآ فى فترة التعارف بتبقى عايزة تبينله إنها مش فقيرة وإنه مشترهاش بفلوسه ، وتعمل فيها عنتر بن شداد وتبقى عايزة تدفع الحساب ، وكل ما الراجل يصر على الدفع هى ممكن تسترخمه جدآ .

مداعبتها ومغازلتها دائمآ

برضه مش هنقول إن المرأة مش عايزة اللى يغازلها ، لكن تخيل كدة البنت تكون تعبانة ومتبهدلة وساقطة فى الإمتحان ، و ييجى فارس أحلامها بكل سماجة ويقولها " أنا بموت فى جمال عنيكى " وهو طبعآ فاكر إن الكلمتين دول هيخففوا عنها ، ولكن العكس هو الصحيح ، ويمكن تطلع غلها كله فيه .

الستات بتحب الرجل المهزار دائمآ

وهنا الرجالة بيعتبروا إن الست تريد أن تسخسخ دائما طول ما هى قاعدة ، وفاكرين إن المرأة تهوى الرجل الفكاهى اللى قالبها مسخرة وضحك وتريقة ومقضيها إفيهات ، ولكن إحذر عزيزى الرجل ؛ فالمرأة أحيانآ تريد أن تراك جاد وحازم فى أمور عديدة ولا تنتظر منك وقتها أن تكثر من الهزار لأنها تعتبره إستظراف .

الراجل دايمآ معاها وميسبهاش لحظة

كل الرجالة فاكرين إن اللزقة للمرأة بتعجبها وإنها بتحب الراجل اللى دايمآ تحت عينها وميروحش بعيد أبدآ ، ولكن المقولة دى مش صح على طول الخط ، فأحيانا تكون لزقة الرجل للست خنقة وتتضييع وقت ورخامة .